ROXAS CITY- Patay ang isa ka senior citizen matapos mabungguan sang isa ka salakyan sa Barangay Poblacion Sur, Sigma, Capiz.
Ginkilala ang biktima nga si Adelina Gumugda, 67-anyos kag residente sang Barangay Tugas, Mambusao Capiz.
Sa inisyal nga imbestigasyon sang traffic section sang Sigma Police Station nga ginasubay sang salakyan nga Toyota vios ang dalanon nga ginamaneho sang suspek nga si Jing Bolivar, 39-anyos kag residente sang Barangay Rumagayray, San Enrique, Iloilo sang hinali nga nagtabok sa dalan ang biktima.
Ginapahayag nga nabungguan sang salakyan ang biktima sa diin nag-angkon ini sang patal nga pilas nga posible gintunaan sang iya gilayon nga kamatayon.
Ginpadangat pa sa ospital ang biktima apang gindeklarar ini nga dead on arrival sang attending physician sang Dao District Hospital.
Mahibaluan nga nakalab-ot sa nasambit nga lugar ang tigulang bangud nagpamaskwa ini sa iya nga kakilala.
