ROXAS CITY – Ginkompirmar ni Maayon Mayor Raymund Malapajo nga gin-aprubahan sang Regional Inter-Agency Task Force ukon RIATF ang resolution nga nagahinyo sang isa ka bulan nga “time-out” sa pagpapuli sa mga LSI’s sa ila nga banwa.
Sa interview sang Bombo Radyo kay Malapajo nga sumugod subong nga adlaw Disyembre 8 tubtob Enero 8 indi anay magabaton sang mga LSI’s ang nasambit nga banwa kag magaresume ini sa Enero 9.
Suno kay Malapajo nga ginpakamaayo anay sini nga untaton ang pagbaton sang mga LSI’s bangud luyag sini nga mahatagan sang pahuway kag kusog ang ila mga frontliners.
Dugang pa sini nga magapatigayon man sila sang disinfection kag pagpakaayo sa mga quarantine facility.
Naghinyo ini sa mga pumuluyo sang nasambit nga banwa nga kuntani maintiendihan man ang nasambit nga desisyon agud hilway ang tanan batuk sa COVID-19.
Samtang, nagapanawagan naman si Malapajo sang hugot nga kooperasyon sa mga pumuluyo sang amo nga banwa nga mag-ugyon kag magsunod sa mga minimum health protocols agud malikawan ang pagdamo sang kaso sang makamamatay nga virus.
