ROXAS CITY – Gin-aprubahan na sang Regional Inter-Agency Task Force ang request sang alkalde sang Panitan nga ipaiway anay ang pagbaton sang mga LSI’s sa nasambit nga banwa.
Ini ang ginkompirmar ni Mayor Katherine Belo sang mainterview sang Bombo Radyo.
Suno kay Belo nagpadala ini sang request sa RIATF may kaangtanan sa temporaryo nga pagpauntat ukon time-out sa pagpapauli sang mga LSI’s kag aprubado na ini pinaagi sa Resolution No. 75 Series of 2020 sadtong Nobyembre 24, 2020.
Ginpahayag sini nga sumugod sa Disyembre 9 tubtob Enero 4, 2021 indi anay magabaton sang mga LSI’s ang amo nga banwa agud mahatagan man sang Christmas break sa adlaw sang paskwa ang mga frontliners kag tion nga ma-clear ang mga quarantine facility, makapatigayon sang rehabilitation, improvement kag maintenance sa mga COVID-19 Vehicles kag quarantine facility.
Ginklaro ni Belo nga apisar ginpauntat ini magapahamtang sa gihapon sila sang on-call system para sa COVID-19 emergency.
Apang, ginpasalig man sang amo nga alkalde nga ang mga LSI’s nga magapauli antes ang gintalana nga petsa sang suspensyon ang magapabilin naman sa quarantine facility sang amo nga banwa.
Mahibaluan nga magluwas sa Panitan gin-aprubahan man ang suspensyon sa pagbaton sang mga LSI’s ang gina-request ni Mayor Amado Eriberto sang banwa sang Dumalag sumugod sa Disyembre 5 tubtob Enero 5, 2021.
