ROXAS CITY – Patay ang 35-anyos nga tiyo matapos ginbuno sang 19-anyos nga hinablos sa Barangay Li-ong, Roxas City.
Nag-angkon sang pilas sa naidalum nga bahin sang ilok ang biktima na si Bobby Taleon.
Ba-se sa impormasyon sang Roxas City PNP, naakig ang biktima nga sa iya pagpauli sa balay, wala ini ginpreparahan sang utod nga si Grace Marie Taleon, iloy sang suspek nga si Rexy Angelie Taleon.
Kasunod sang pagwaras sang biktima ang pagkuha sini sang kutsilyo, apang ginpunggan ni Grace ang utod agud indi na ini makapanakit pa sang iban nga tawo.
Bangud sa ginhimo ni Grace napilasan ini sa kamot kag ang nasambit nga scenario ang nakita sang suspek, sa diin naakig ini sang makita nga napilasan ang iloy.
Gilayon ini nga nagkuha sang kutsilyo kasunod ang pagbuno sa tiyo.
Gindala sa ospital ang biktima apang gindeklara nga dead on arrival.
Samtang boluntaryo naman nga nagsungka sa Roxas City PNP ang suspek nga hinablos kasunod ang pagturn -over sa kutsilyo nga gingamit sa pagbuno sa tiyo.
