ROXAS CITY – Patay ang 62 anyos nga tiyo matapos nga ginlabu sang iya kaugalingon nga gumangkon sa Barangay San Nicholas, Tapaz, Capiz.
Ginkilala ang biktima nga si Esmundo Gapi kag residente sang nasambit man nga lugar.
Sa interview sang Bombo Radyo sa imbestigador sang Tapaz Municipal Police Station nga si Police Senior Master Sergeant Rocer Garde, ginpahayag sini nga nagbaisay ang biktima kag ang suspek nga iya man gumangkon nga si Joey Melicado, 35 anyos.
Nag-ugat ang pagbaisay sang duha sang ginkaakig sang suspek ang pagpahulam sang biktima sang iya nga charger kag battery sang salakyan nga lipod sa iya nga ihibalo.
Bangud sa init sang ila pagbaisay, nagtuyo nga magkuha sang binangon ang biktima apang gin-unahan na ini sang labu sang suspek gamit man ang iya nga binangon.
Nag-angkon sang mga patal nga pilas sa likod nga porsyon sang ulo, natuo nga kamot, tiyan kag likod ang biktima bangud sang pagpanglabu sang suspek.
Gindala pa ang biktima sa ospital apang gilayon man ini nga ginbawian sang kabuhi.
Sa karon nakaaresto naman sa Tapaz Municipal Police Station ang suspek matapos boluntaryo nga nagsungka sa mga pulis.
