TAPAZ, CAPIZ – Patay ang 48 anyos nga lalaki matapos gintiro sang iya kaugalingon nga gumangkon sa Barangay Bagong Barrio, Tapaz, Capiz.
Ginkilala ang biktima kay Lito Gamalando, residente sang nasambit man nga lugar.
Suno kay Police Senior Master Sergeant Rozher Garde, imbestigador sang Tapaz Municipal Police Station, ginhambalan sang biktima ang suspek nga si Genesis Gamalando, 31 anyos nga untaton na ang ila nga pag-inom.
Apang sa ila nga nga pagguha sa balay sang biktima, nagbaisay ang duha tubtob sa gintiro na sang suspek ang iya nga tiyo.
Nag-angkon sang mga igo sa dughan, tiyan, guya kag liog ang biktima.
Madasig naman nga nakapalagyo ang suspek dala ang armas-luthang nga iya gingamit sa pagtiro sa iya nga tiyo.
Gindala pa sa Tapaz District Hospital ang biktima apang gindeklarar ini nga dead on arrival.
Narekober naman sang mga kapulisan ang isa ka empty shell sang .45 calibre nga armas-luthang sa ginluntaran sang insidente.
