ROXAS CITY -Ginkompirmar ni Punong Barangay Emily Ariza nga naghusay na ang tricycle driver kag iya nga tiyo nga ginaalegar nga nag-tambang kag pagtuyo paglampus sang kawayan sa iya sa Barangay Dayao Roxas City.
Ginpahayag ni Ariza nga naghusay ang tagreklamo nga si Anderson Vasquez kag tiyo sini nga si anay barangay kagawad Gilbert Donguines sa ginaalegar pagtambang kag pagtuyo lampus sang kawayan sang nasambit nga tiyo sa gumangkon.
Suno kay Ariza nga nagpirmahanay na ang magtimbang nga bahin nga nagapamatuod nga ginhusay na sila.
Gin-athag diri ni Ariza nga wala ini sang natabo ang insidente kabaliskaran sa alegasyon ni Vasquez kag indi pagpang-ambang ang natabo.
Suno kay Ariza nga si Donguines kag si Vasquez gid lamang ang magkaupod sang natabo ang insidente.
Apang aminado si Ariza nga nagpatigayon ang barangay contact tracing sa mga na close contact sang nagpositibo nga repatriate.
Samtang ginpanginwala man sini nga may yara ini sang ihibalo sa ginaalegar close contact ni Vasquez sa nagpositibo sa COVID.
Matandaan nga nagreklamo sa Roxas City Police Station si Vasquez matapos nga ginaalegar sini nga gintambangan ni Donguines kag gin tuyo pa nga lampusan sang kawayan matapos nga ginpasimangdan nga naka close contact ang nagpositibo nga repatriate.
