ROXAS CITY – Nagsungka na sa mga kapulisan ang suspek nga tiyo nga nagpatay sa iya gumangkon nga 17-anyos nga solterito matapos nga ginluthang sa Barangay Carataya, Cuartero, Capiz.
Sa interview sang Bombo Radyo kay Deputy Chief of Police sang Cuartero Municipal Police Station nga si Police Executive Master Sergeant Arnold Batacandolo nga nagpadulong sa balay sang wala na ginhingadlan nga biktima ang suspek nga tiyo man sini nga si Rommel Felipe 40-anyos sang nasambit nga lugar kag ginpangita ang iya nga magulang.
Bangud sa kaakig sang suspek ginaalegar nga ginluthang-patay sini ang iya gumangkon nga naigo sa agtang kag paa.
Gindala pa sa Dao District Hospital ang biktima apang gindeklarar man ini nga dead on arrival.
Nagaguha sa imbestigasyon sang mga kapulisan nga ang kontra sang suspek amo ang magulang sang biktima.
Mahibaluan nga antes natabo ang insidente, nag-angkon sang komosyon sa tunga sang suspek kag magulang sang biktima.
Narekober naman sa crime scene ang apat ka mga basiyo sang kalibre 45 nga armas-luthang nga ginamit sang amo nga suspek.
Sa karon nakahunong na sa karsel sang Cuartero PNP si Felipe kag natalana nga pasakaan sang nagakaigo nga panumbungon.
