ROXAS CITY – Iga-deploy sang tagdumalahan sang Traffic Management Head (TMU) ang 60 porsyento nga manpower agud makontrol ang dalagan sang trapiko kadungan sang pagbukas sang SM Roxas sa Arnaldo Boulevard, Roxas City, buwas nga adlaw, Abril 8.
Ini ang ginpahayag ni Mr. Gonzalo Andrada Jr., pinuno sang TMU, sang mainterview sang Bombo Radyo.
Ginpahayag sini nga magasugod ang deployment sang ila mga tinawo alas 6:00 sa aga tubtob alas 8:00 sa gab-i, agud mamentinar ang ilog sang trapiko sa amu nga lugar.
Magapahamtang man sang mga traffic signs, kasubong sang no parking, no left turn, no U-turn, kag yara man sang U-turn slots para sa mga motorsiklo kag traysikol agud malikawan ang pagginutok sa karsada.
Dugang pa ni Andrada, nga expektaron sang pumuluyo nga may yara sang trapiko apang, tinguhaan gid sang mga katapo sang TMU nga mapahagan-hagan ini.
Ginklaro man sini nga wala sang iga-sarado nga dalan.
Nagapangabay man si Andrada, sa mga drayber nga sundon ang mga pagsulundan, ilabi na ang traffic signs agud malikawan ang pagginutok sa amo nga lugar.
