Nakabalhag sang kabug-usan nga 4,849 nga traffic violators ang Traffic Management Unit (TMU) sa syudad sang Roxas sang tinalikdan nga tuig 2024.
Sa interview sang Bombo Radyo kay Mr. Gonzalo Andrada, Head sang Traffic Management Unit, ginpahayag sini nga nagapanguna nga ginalapas sang mga motorist ang Driving without License kun sa diin nakadakop ang mga ini sang 868 violators, ginsegundahan naman sang Driving with No Helmet nga may 861 kag ginsundan naman sang mga colorum nga traysikol nga nagabyahe sa syudad kag iban pa.
Dugang pa sini nga sang bulan sang Pebrero 2024, ang bulan nga nakabalhag sang may pinakamadamo nga naglapas partikular na sa Driving with No License kun sa diin nakabalhag ang mga ini sang 137 violators nga ginsundan naman sang mga colorum nga may rekord nga 110.
Suno pa kay Andrada, wala sila naga-untat sa pagbantay sa mga dalanon sang syudad kag ila man paga-aksyunan ang mga colorum nga traysikol nga padayon sa gihapon nga nagabyahe sa syudad.
Panugyan ni Andrada sa publiko, mangin defensive driving ilabi na sa safety, siguruhon man nga antes maglakat, indi magkalipat nga magsuksok sang helmet kag ilabi sa tanan magsunod sa rules and regulations sang trapiko nga ginapatuman sa syudad.
