ROXAS CITY – Nakilan-an na sang Traffic Management Unit (TMU) ang tricycle driver sang colorum nga nagsukot sang P400 sa duha ka pasahero nagikan sa Roxas City airport padulong sa St. Anthony College Hospital sa San Roque Extension.
Sa interview sang Bombo Radyo kay Mr. Gonzalo A. Andrada Jr., Traffic Management Unit Head, ginsiling sini nga padayon ang ila pagpangita sa nasambit nga tricycle driver kag ginkumpirmar sini nga colorum ang dala nga tricycle, apang sa karon indi pa mahimo ipalayag sa kahanginan ang pagkakilanlan.
Suno diri, kun madakpan ang tricycle driver, indi ini magpangatubang sa overcharging bangud ini nga opensa ang para lamang sa mga may prangkisa ukon city number apang magapangatubang ini sa iligal nga pagbiyahe sang colorum ilabi na nga may nagreklamo nga pasahero.
Dugang pa ni Gonzalo, pagakumpiskahon man ang traysikol sini kun madakpan kag magabayad sang nagakaigo nga penalidad.
Panugyan sang TMU Head sa mga pasahero, kun mahimo indi na magsakay sa mga wala city number nga traysikol para mapalayo sa anuman nga isyu kag kun may reklamo, madali mapangita kun rehistrado ang numero sang ginasakyan.
