Padayon nga ginabantayan ang presensya sang mga manugbaligya sa bypass road sang Barangay Dayao, Roxas City.
Sa interview sang Bombo Radyo kay Gonzalo Andrada, Head sang Traffic Management Unit (TMU)-Roxas City,iya ginpahayag nga nagatuga sang traffic ang nasambit nga mga manugbaligya nga ginareklamo man sang pila ka mga motorista bangud ang mga stall sini ang malapit na sa highway.
Suno kay Andrada, may posibilidad nga makahatag ini sang peligro sa mga motorista kag pedestrian ilabi na nga madamo sang mga salakyan ang nagaagi sa amo nga bypass road.
Pahayag pa niya, nagpakig-angot man sila sa mga barangay officials sang amo nga barangay kag didtu gin-athag ni Punong Barangay Wennie Batuampo nga gin-arrange na ang mga manugbaligya nga sa isa ka bahin sang dalan ang vendor kag sa isa man ka bahin sang dalan ang pagparking sang mga salakyan.
Ginhingyo man sang natungdan ang kooperasyon sang mga vendor kag mga motorista agud mapadayon ang kaluwasan kag husto nga dalagan sang trapiko sa nasambit nga lugar.
Samtang, bukas naman ang istasyon sang Bombo Radyo Roxas para sa bahin sang Barangay Officials sang Barangay Dayao, Roxas City.
