Isa ka fully functioning nga toilet nga human sa puro nga 18-karat nga bulawan ginbaligya sa balor nga $12.1 milyon (katumbas sa kapin sa 700 milyon ka pesos) sa isa ka auction sang Sotheby’s.
Ang 223-pound nga toilet, nga ginhingadlan “America,” ang ginhimo sang kontrobersyal nga artist nga si Maurizio Cattelan.
Siya man ang yara sa likod sang bantog nga artwork sang saging nga gintapik sa dingding gamit ang duct tape.
Suno kay Cattelan, ang gold toilet isa ka “satire” ukon kritisismo sa sobra nga pagsimba sa kwarta kag kaluho sang iban sa Estados Unidos.
Antes sang auction, ang toilet gin-display sa Sotheby’s New York headquarters, apang ang paggamit sini estrikto nga ginadumilian.
May yara man sang mas nauna nga bersyon sang “America” nga ginpasundayag sa Blenheim Palace sa England, apang ginkawat ini.
Nagapati ang mga imbestigador nga ang kinawat nga kasilyas gintunaw sang mga naghimo sang krimen kag wala na ini narekober.
