Isa ka bag-o nga ginbuksan nga spa sa Tokyo nagakuha karon sang atensyon tungod sang iya pinasahi nga paagi sa pagrelaxs: ang meditation sa sulod sang lungon.
Ang establisimento, nga ginatawag Meiso Kukan Kanoke-in sa Takadanobaba, nagatuyo sa paghatag sa iya mga client sang kahigayunan nga magpamalandong sa kabuhi paagi sa pagkamahunahunaon sa konsepto sang kamatayon.
Sa 2,000 yen (katumbas sa 780 pesos), ang isa makahigda sa sulod Japanese-style nga lungon sa sulod sang 30 minutos.
Samtang yara sa sulod, ginapalig-on sila nga magpamalandong ukon magrelaxs samtang nagapamati sa makapaayo nga musika. May gamay man ini nga bintana nga pwede buksan kon indi na komportable sa sulod.
Suno sa Spa, bukas ini sa tanan nga relihiyon.
Apang, ang parlor may estrikto nga mga pagsulundan sa kaluwasan. Nagabaton lamang sila sang mga kliyente nga naga-edad 18 anyos pataas, indi magsobra sa 6 feet ang kataason, kag nagabug-at sang manubo sa 90 ka kilogram.
Hugot man nga ginadumilian ang serbisyo para sa mga tawo nga may claustrophobia ukon kahadlok sa gutok nga mga lugar, kag ang sin-o man nga magtilaw sini kinahanglan nga yara sa maayo nga panghunahuna.
