ROXAS CITY – Ginpahayag sang nag Top 1 sa Guidance Counselor Licensure Examination (GCLE) nga tumandok sang Capiz, nga ang pagpokus kag padayon nga pagtuon ang may yara gid sang positibo nga bunga.
Sa interview sang Bombo Radyo kay Dr. Ryan Michael Oducado, nagdako sa Roxas City, Capiz apang taga-Sapian ang iya ginikanan, kag sa karon propesor sang College of Nursing kag Director sang University Research and Development Center (URDC) sang West Visayas State University, ginsiling sini nga wala man ini nagpangibabaw sadto, sa pagkamatuod, diyutayan lang ini nga malagbong sang second year high school, bangud sa isa ka subject.
Bangud diri, nareyalisar niya nga dapat tun-an ang amu nga subject ilabi na kun diin ikaw mahina, tubtob nga ang grado sini nga line of 7, nangin 90+ antes magtakup ang quarter.
Nahibaluan nga antes ini nangin Top 1 sa (GCLE), nangin top 2 man si Oducado sa Midwife Licensure examination sadtong 2014, kag maka-apat man ka beses nga nagkuha sang nagkalain-lain nga pasinawan.
Magluwas sa Midwifery kag Guidance counselor exams, lisensiyado naman ini bilang Nurse kag Teacher.
Isa man ka lifelong learning advocate si Oducado, gani wala ini nagauntat sa pagtuon.
Ginpakigbahin man sini nga importante ang pagtimakas kag disiplina sa pagtuon kun luyag mo nga malab-ot ang imo handom.
