Arestado ang isa ka wanted nga persona matapos ginserbihan sang warrant of arrest sang mga katapo sang Pontevedra Municipal Police Station kag San Miguel Municipal Police Station sa Barangay Rizal, Pontevedra, Capiz.
Ginkilala ang nadakpan nga si Jun Benotopa, 30 anyos, residente sang nasambit man nga lugar nga akusado sa kaso nga Murder.
Mahibaluan nga si Benotopa ang ginakabig nga Top 4 Most Wanted Person sa San Miguel, Iloilo.
Ang warrant of arrest batuk sa akusado ang ginpapanaog kag ginpirmahan ni Judge Victorino Oliveros Maniba, Jr., sang RTC, 6th Judicial Region, Iloilo City sadtong Hulyo 16, 2020.
Wala sang ginrekomendar nga piyansa ang korte para sa temporaryo nga kahilwayan sang akusado nga yara karon nakahunong sa karsel sang Pontevedra Municipal Police Station.
