Arestado ang top 4 Most Wanted Person sa Municipal level sa ginpatigayon nga operasyon may kaangtanan sa kaso nga murder sa Brgy. Nayawawan, Tapaz Capiz.
Ang arestado amo si alyas Ipaw, 38-anyos, kag isa ka mangunguma.
Sa interview sang Bombo Radyo kay Police Major Gregg Anthony V Salbang, Officer in Charge sang Tapaz Municipal Police Station, iya ginpahayag nga Non-Bailable ukon wala sang piyansa ang warrant nga gin-isyu batok sa suspek.
Suno pa kay Salbang, sa ila pagpatigayon sang body testing sa suspek narekober sa iya ang homemade 12 guage nga firearm kon sa diin dugang nga kaso may kaangtanan sa paglapas sang Comprehensive Firearms and Ammunition Regulation Act ukon Republic Act No. 10591 ang iya pagaatubangon.
Dugang pa sini, daku nga accomplishment ang pagkadakop sa arestado sa gintawag nga peace and order bangud isa man siya nga ginakahadlukan sa ila mga kaingud balay kon sa diin may dala siya nga permi nga armas-luthang.
Sa subong, yara na sa kustodiya sang Tapaz Municipal Police Station ang suspek para sa nagakaigo disposisyon.
