PILAR CAPIZ – Dakop ang ginakabig Top six (6) Most Wanted Person sa Provincial Level sa Barangay San Blas, Pilar Capiz.
Ginkilala ang akusado kay alyas “Felix”, 68-anyos, mangunguma kag residente sang nasambit nga lugar.
Sa impormasyon nga nakuha sang Bombo Radyo nagikan sa Pilar Municipal Police Station, ginpahayag sini nga natigayon nga madakpan si Felix pinaagi sa gintingub nga pwersa sang Pilar MPS, Provincial Intelligence Unit (PIU), Provincial Intelligence Team (PIT) 1st CPMFC 4th Maneuver Platoon kag Capiz PPO.
Ang warrant of arrest ang gin-isyu kag ginpirmahan ni Hon. Eric Anthony A. Dumpilo, Acting Presiding Judge, RTC, Sixth Judicial Region, Branch 14, Roxas City, Capiz kag napetsahan Setyembre 20, 2024.
Nagapangatubang naman sa kaso nga rape ang nasambit nga akusado.
Sa karon, yara na sa paghinakop sang Pilar Municipal Police Station ang nadakpan para sa nagakaigo nga disposisyon kag natalana nga i-turn over sa court of origin.
