Nadakpan sang mga kapulisan ang isa ka Top 7 Most Wanted Person sa provincial level matapos serbihan sang Warrant of Arrest sa Barangay Poblacion, Sapian, Capiz.
Ang arestado amo si alyas Toto, 29 years old, kag residente sang nasambit nga lugar.
Sa interview sang Bombo Radyo Roxas, ginpahayag ni PLT. Steve Ian Bautista, Officer-in-Charge sang Sapian Municipal Police Station, iya gin pahayag nga nagpatigayon sang operasyon ang Sapian Municipal Police Station matapos makabaton sang Warrant of Arrest batok sa suspek.
Suno pa sa iya, gilayon nga nagpatigayon sang intelligence monitoring ang kapulisan agud matumbok ang lokasyon sang subject person.
Nadiskubrehan sang mga otoridad ang presensya sang suspek sa Barangay Poblacion, kun sa diin gilayon nga ginserbihan ang Warrant of Arrest kag gindakop ini.
Base sa impormasyon sang kapulisan, ginakabig si alyas Toto nga Top 7 Most Wanted Person sa provincial level kag ginapangatubang sang duha ka counts sang rape by sexual assault.
Sa karon, yara na sa kustodiya sang Sapian MPS ang akusado samtang ginahulat ang commitment order para sa temporaryo sini nga detention sa korte.
Samtang, nagpasalamat ang Sapian MPS sa mga pumuluyo sang banwa nga nagahatag sang impormasyon may kaangtanan sa mga persona nga may yara sang Warrant of Arrest.
