Tuman ang kalipay sang Top 7 Licensure Examination for Teachers passer sa iya nga pagkapasar sa pasinawan.
Sa interview sang Bombo Radyo kay Keneth Rone, tumandok sang Pontevedra kag nagtapos sang Bachelor of Secondary Education major in Science sa Capiz State University-Pontevedra Campus, iya ginpahayag nga tubtob subong daw indi siya magpati nga isa na siya ka licensed professional teacher.
Suno kay Rone, indi niya first choice ang ang kurso nga education, apang mas ginpalangga niya ini sang ulihi bangud nagustuhan niya ang pagtudlo sa mga estudyante.
Dugang pa niya, wala gid niya ginapaabot nga makapasar siya kag mangin isa sa mga topnotcher.
Pahayag pa niya, apisar pa nga may yara sang financial problem, wala ini nangin upang sa agud nga matapos ang iya pag-eskwela kag makapangita sang trabaho.
Dugang pa niya, wala gid san tion nga nadulaan siya sang paglaum bangud handum niya nga matagaan sang maayo nga buwas-damlag ang iya pamilya. ]
Daku man ang iya pagpasalamat sang natungdan sa iya pamilya kag sa tanan nga nagsuporta sa iya padulong sa iya kadalag-an.
