ROXAS CITY – Arestado ang isa ka lalaki, matapos maserbihan sang warrant of arrest sa Barangay Poblacion Proper, Mambusao, Capiz.
Ginkilala ang nadakpan kay alyas “Toto”, 50-anyos kag residente sang Barangay Caidquid sa nasambit nga banwa.
Mahibaluan nga ginakabig si alyas “Toto” bilang Top 9 Regional Level Most Wanted Person kag nagapangatubang sa kaso nga murder.
Ang warrant of arrest ang gin-isyu kag ginpimahan ni Presiding Judge Rommel L. Leonor, Regional Trial Court, Branch 21, hall of justice Mambusao, Capiz kag napetsahan Abril 4, 2023.
Wala sang may ginrekomendar nga piyansa ang korte para sa temporaryo sini nga kahilwayan.
Sa karon, yara na sa kustodiya sang Mambusao Municipal Police Station si alyas “Toto” para sa nagakaigo nga disposisyon.
