ROXAS CITY – Bugal sang probinsya sang Capiz ang duwa ka mga estudyante sang Capiz State University Main Campus sang nangin topnotcher ang mga ini sang nakaligad nga Registered Master Electrician Examination sang Abril, 2022.
Nakakuha sang 93% rating si Rodriner Casugbo Billones rason nga nangin top 1 ini samtang si Queenstant Dianne Jean Bayaban Banico ang Top 10 nga may 87% nga rating score.
Sa interview sang Bombo Radyo, ginsiling ni Billones nga tubtob subong indi pa ini makamove-on sa resulta. Nangin inspirasyon sini ang iya amay nga isa ka mechanical engineer kag tiyo nga isa man ka electrical engineer.
Ginpahayag man ni Banico nga overwhelmed pa ini tubtob subong kag tuman ang kasadya kag pasalamat bangud nadala sya sa top 10.
Inspirasyon man sini ang iya nga amay nga isa ka calibrator nga nagatrabaho sa CAPELCO.Mahibaluan nga sang 2021 kuntani ang RME examination apang na postponed ini bangud sa Covid-19 rason nga nangin malawig ang pagreview sang duwa.
Apisar nga 3rd year college pa lang ang mga ini apang pwede na sila makakuha sang RME examination kun may ari ang mga ini sang certificate of experience kag certificate of employment for 1 year nga gina-require sang PRC.
Dugang pa sang mga ini nga indi nangin madali ang ila naagyan sa pag eskwela ilabi na si Billones nga 1st year pa lang nalagbong na ini kag amu ang nangin rason kun ngaman nagbakas siya bangud gusto sini maka gradwar as early as possible, Kasubong man sa pagkuha exam bangud malawig ang coverage sang ila examination apang gintagaan nila sang dako nga oras ang pag answer kag ginreview mayad antes ginpasa sa proctor.
Nagapasalamat man ang mga ini sa ila mga ginikanan nga nangin inspirasyon, sa ila buluthoan kag sa pila ka mga manunudlo nga nagbulig sa ila nga mapasar ang nasambit nga examination.
Advice sang mga ini sa wala makapasar kag magakuha pa lang sang exam nga indi magpaka-stress, magpanumdom sang negative thoughts, magtuon adlaw-adlaw kag ilabi sa tanan mangamuyo sa Ginoo.
Plano sang duwa nga magpa blow-out sa pamilya kag mga abyan gamit ang incentives nga ginhatag sang ila buluthoan kag plano nga magkuha sang licensure board examination sa sunod nga tuig.
Ginpakigbahin man sini, nga maga-gradwar ang mga ini sa palaabuton nga Hunyo.
