Opisyal na nga nagpungko bilang bag-o nga hepe sang Philippine National Police si Police Major General Nicolas Torre III.
Siya ang tumandok sang Jolo, Sulu kag naga-edad 54 anyos.
Ginbuslan ni Torre sa pwesto si Police General Rommel Marbil, sa diin ang extended term sini ang ma-expire sa Hunyo 7.
Si Torre amo ang ika-31 nga PNP Chief kag una nga alumnus sang Philippine National Police Academy nga magapamuno sang police organization.
Matandaan nga sang nagligad nga semana, gin-anunsyo ni Executive Secretary Lucas Bersamin nga si Torre ang napili-an ni President Ferdinand Marcos Jr. nga mangin PNP Chief.
Nahibaluan nga si Torre bilang Criminal Investigation and Detection Group (CIDG) chief, ang nanguna sa pag-aresto kay former President Rodrigo Duterte bangud sa mga kaso nga crimes against humanity may kaangtanan sa drug war sang anay administrasyon.
Si Torre ang nangin CIDG Chief humalin Septyembre 25, 2024 tubtob sa pagbutang sa iya bilang hepe sang PNP.
Sang nangin Director sang Police Regional Office 11 si Torre, siya man ang nanguna sa pag-aresto kay Kingdom of Jesus Christ founder Apollo Quiboloy sang Septyembere 8, 2024 sa Davao City bangud sa mga kaso nga human trafficking kag sexual exploitation sang mga menor de edad.
Nagserbe ini bilang director sang PRO 11 humalin sang Hunyo 18, 2024 tubtob Septyembre 24, 2024.
Siya man ang nangin director sang Communications and Electronics Service sang PNP humalin Abril 3 tubtob Hunyo 17, 2024.
Si Torre man ang nagserbe nga Quezon City Police District chief humalin Agosto 8, 2022 tubtob Agosto 30, 2023.
