SA UAE– Ginpatuman na ang total lockdown sa bug-os nga United Arab Emirates (UAE) para indi na maglapta ang coronavirus disease 2019 (COVID-19) sa lugar.
Sa report ni Bombo International Correspondent Maritess Rufo, tumandok sang Pontevedra, Capiz kag nurse sa isa ka government hospital sa Dubai, kasunod sang pagpatuman sang lockdown sa UAE ang pag-untat biyahe sang mga public transport kasubong sang train kag hugot nga ginadumilian ang pagguwa sang mga residente sa ila nga balay magluwas na lamang sa isa ka miyembro sang pamilya nga magabakal sang pagkaon ukon bulong sa botika.
Sarado naman ang mga eskwelahan kag naga-home school na lamang ang mga estudyante.
Wala sang panic buying ukon pagtaas sa presyo sang mga nagapanguna nga balaklon kag tanan ang may access sa ila mga kinahanglanon kasubong sang face mask kag gloves, bilang proteksyon batuk sa COVID-19 bangud kontrolado sang gobyerno ang presyo.
Saludo man si Rufo sa UAE government bangud disiplinado ang mga tawo sa diin wala sang fake news nga nagaguwa kag kontrolado sang gobyerno mangin ang social media.
Daku man ang nahimo sang massive sterilization kag sanitation sa mga karsada kag pagdis-infect sa mga facilidad para indi na maglapta ang COVID-19.
Wala man nagakulang ang Philippine Consulate sa paghatag sang public awareness sa mga OFW’s sa pungsod labi na ang pagsunod sa mga laye sang UAE.
Samtang madamo sang testing center sa pungsod nga nagahatag sang libre nga test para mahibaluan kun positibo ukon negatibo sa COVID-19.
Ginpahayag nga sa sulod lamang sang lima ka minutos mahimo na nga makuha ang resulta sang COVID-test.
Nahibaluan nga tanan nga government hospital sa UAE ang nagaserbe nga referral center sang mga COVID-19 patients.
