Magalunsar sang komprehensibo nga pagrepaso ang Senate Committee on Social Justice, Welfare, and Rural Development sa implementasyon sang Juvenile Justice and Welfare Act. Ang inisyatibo nagatinguha nga usisaon kon epektibo pa ang kasamtangan nga mga probisyon sang layi kag kon kinahanglan ini amendahan.
Suno kay Sen. Erwin Tulfo, chairman sang komite, lakip sa pagahisugtan ang kakulangan sang mga Bahay Pag-asa para sa Children in Conflict with the Law, ang posibilidad nga mapanagutan man ang mga ginikanan sa mga sala sang ila kabataan, kag kon ang minimum age of criminal responsibility nga 15 anyos ang edad angay pa sa subong nga kahimtangan.
Ginpahayag man sang senador nga nagapakigkonsulta na ang komite sa mga eksperto sa layi, law enforcement agencies, social welfare groups, simbahan, medical professionals kag mga ginikanan agud makabaton sang nagkalain-lain nga panan-aw antes maghimo sang mga rekomendasyon.
Ginlaragway ni Tulfo nga ang katuyuan sang pagrepaso amo ang pagpaayo sang implementasyon sang layi agud mabalanse ang paghatag sang hustisya sa mga biktima kag ang matuod nga rehabilitasyon sang mga menor de edad nga nakasala.
