ROXAS CITY – Ginkumpirmar ni Punong Barangay Reynaldo Magallanes nga may yara sila sang isa ka residente sa Barangay Baybay sining siyudad ang nag-ubra anay sa baligyaan sang 54-anyos nga bag-o lang nagpositibo sa Coronavirus Disease ukon COVID-19 sa Barangay Cagay, Roxas City.
Suno kay Magallanes nga may isa ka residente sa ila barangay ang nagaserbi nga trabahador sa tindahan sang COVID-19 patient sa Burgos Talipapa, Burgos Street, Roxas City.
Gin-athag sang nasambit nga opisyal nga wala man ini naka-close contact sa amo nga pasyente apang ginpakamaayo na lamang sini nga ipidalom ini sa strict home quarantine.
Dugang pa sini nga ang naka-close contact lamang sa amo nga COVID-19 patient ang iya man lang asawa.
Mahibaluan nga isa ka 54 anyos nga lalaki nga residente sang Sitio Kagitingan sang Barangay Cagay ang nagpositibo sa amo nga balatian.
Ginapahayag nga wala ini sang travel history ukon exposure sa COVID19 patient kag nagapabilin pa karon nga ginabulong sa Roxas Memorial Provincial Hospital.
