Ginpasiguro sang Department of Migrant Workers (DMW) nga may nagahulat nga trabaho para sa overseas Filipino workers (OFWs) nga magapauli sa Pilipinas nga nagikan sa Lebanon sa tunga sang nagasingki nga tensiyon sa tunga sang Israel kag Hezbollah militants.
Ginpahayag ni DMW Secretary Hans Leo Cacdac nga ang mga ahensiya sang gobyerno kasubong sang Department of Labor and Employment (DOLE) kag Technical Education And Skills Development Authority (TESDA) ang nagatan-ay sang post-repatriation assistance sa OFWs nga magapauli halin sa conflict areas kasubong sang Lebanon.
Suno kay Cacdac, nagatan-ay man sila sang job facilitation sa iban nga pungsod, kun sa diin pagalantawon ang records kag experience sang OFWs agud makatrabaho sila sa iban nga pungsod.
Magluwas sini, ang mga magapauli nga OFWs ang magabaton man sang bulig gikan sa gobyerno.
Sa karon may kabug-usan nga 356 nga Pilipino ang nakapauli na nagikan sa Lebanon. Masobra 11,000 nga Pinoy ang yara sa Lebanon, pila sa ila ang undocumented.
Sadtong Biyernes sang gab-i, nagpaguwa sang abiso ang Philippine Embassy sa Lebanon agud ganyaton ang mga Pinoy didto nga magbiya na samtang bukas pa ang mga paluparan.
Ginaganyat sang embahada ang mga indi naman makapauli nga mag-evacuate sa mga luwas nga lugar sa guwa sang Beirut, South Lebanon kag Bekaa Valley.
