ROXAS CITY – Ginsuspendi ni Capiz Governor Esteban Evan Contreras II ang trabaho sa kapitolyo probinsiyal agud makapatigayon sang disinfection sa bilog nga kapitolyo kag makumpleto sang Provincial Health Office ang ila ginapatigayon nga contact tracing bilang kabahin sang ila health emergency standard protocol bangud sa coronavirus disease 2019 (COVID-19).
Sa gin-isyu nga Memorandum Order No. 45-2020 sang gobernador, epektibo Marso 25 tubtob 27 ang amo nga suspensiyon.
Samtang magapadayon naman ang trabaho sang mga empleyado nga naga-opisina sa guwa sang kapitolyo.
Ginmanduan diri ang Human Resource Management Office nga magdihon sang plano agud mapasiguro nga makahatag sa gihapon sang serbisyo ang mga frontline offices pinaagi sa igapahamtang nga skeletal force sa lugar nga idesignar sang HRMO.
Ginamanduan man ang mga pinuno sang mga opisina sa kapitolyo nga magdihon sang mga pamaagi agud indi maatrasar ang ila pagtanyag sang serbisyo nga kinahanglanon sang mga pumuluyo sa probinsiya.
Ang mando sang gobernador ang kasunod sang pagpositibo na sang probinsiya sa kaso sang COVID-19.
Nahibaluan nga isa ka empleyado sang kapitolyo ang nagpositibo sa COVID-19 nga may yara sang travel history sa Metro Manila.
Ginapahayag nga antes nagpakita sang sintomas sang balatian ang amo nga empleyado, naka-report pa ini sa iya ginatrabahuan nga opisina sa kapitolyo.#
