ROXAS CITY – Arestado ang tatlo ka mga indibidwal sa ginpatigayon nga entrapment operation sang Criminal Investigation and Detections Group (CIDG-Capiz) sa Capricho II, Barangay Tanque, Roxas City.
Ginkilala ang mga naaresto nga sanday Nathaniel Alvarez, 34 anyos, isa ka medical representative kag residente sang Barangay Cagay, sining siyudad; kag mga kaupdanan sini nga sanday Jason Once, 22 anyos kag Nestor Once, 34 anyos, lunsay mga residente sang bayan sang Maayon, Capiz.
Sa interview sang Bombo Radyo kay CIDG-Capiz Head PMaj. Chris Arthemius Devaras, ginpahayag sini nga nagpakig-transaksiyon ang ila miyembro sa mga suspek nga nagabaligya sang alcohol sa mas mataas nga presyo.
Narekober nga karga sang nasambit nga trak ang 20 galloons kag 50 liters sang alcohol nga nagalab-ot sa P200, 000 ang presyo sang mga suspek nga halos doble sa tama nga presyo kun pagabasehan ang suggested retail price (SRP) sang Department of Trade and Industry (DTI).
Suno kay Devaras, magapangatubang ang mga suspek sa panumbungon nga paglapas sa Republic Act 7581 ukon Price Act.
Suno naman kay Juvy Benliro, Consumer Protection Unit-Head sang DTI-Capiz, kinahanglan anay nga tsekyaron ang nakompiskar nga alcohol kag sa tion nga mapamatud-an nga lehitimo ini, posible nga igahatag ang mga ini sa mga frontliners sang coronavirus disease (COVID-19) pandemic sa probinsiya.
