ROXAS CITY – Masuwerte nga wala sang may napilasan sa pagtakilid sang trak nga may karga nga butong, sa national highway nga sakup sang Barangay Amaga, Sigma, Capiz, alas-2:30 kaina sang kaaganhon.
Sandig sa impormasyon nagikan sa Sigma MPS, nagapadulong sa direksyon pa Roxas City ang trak nga ginamaneho ni Alvin Evangelista, residente sang Brgy. Duran, banwa sang Dumalag, sakay ang 5 pa ka wala na ginhingadlan nga mga pahinante.
Apang, pag-abot sa kurbadahon nga bahin sang karsada, ginpahayag nga nadulaan sang kontrol sa manubela ang nasambit nga driver kag nagtakilid ang Mitsubishi truck nga nakarehistro sa pangalan ni Rodelo Floro, sang Brgy. Dolores, Dumalag, Capiz.
Bangud sini, nagkalawas-ag ang mga butong kag naakupar ang tatlo ka linya sang karsada.
Natigayon man nga makaabot ang isa ka trak kag ginpanghalin ang mga nagkalawas-ag nga butong.
