ROXAS CITY – Ginalantaw sa karon nga motibo sang mga kapulisan sa pagluthang-patay sa backrider nga lalaki sa Barangay Balijuguan, sini nga syudad, gab-i sang Biyernes Santo, amu ang pagkadalahig sini sa iligal nga droga.
Apang sa bahin sang ila barangay, ginpahayag ni Punong Barangay Aileen Leones, sang Barangay V, sini nga syudad, nga indi man drug surrenderee ang biktima nga ginkilala kay Manuel Flores alyas Kano, nga may address sa nasambit nga lugar.
Suno kay Punong Barangay Leones, plano na kuntani sang ila konseho nga imbitahan si Flores sa ila barangay bangud sa nababaton nga report nga ginpahayag nagaduso kag nagagamit ini sang iligal nga droga, apang wala ini matigayon bangud indi ini masami nga makit-an sa ila barangay.
Matandaan nga nag-angkon sang patal nga pilas sa ulo si Flores, samtang na-igu man sang pagpangluthang ang driver sang ginasakyan nila nga motorsiklo nga si Joven Flaga, samtang gasgas sa magkatuhay nga parte sang lawas ang naangkon sang isa pa ka sakay nga 17-anyos nga dalagita, nga sa karon, hilway na sa katalagman.
Mensahe sang Kapitana sa iban pa nga nagahimo sang iligal nga bulohaton kaangay sang transakyon sa droga, nga mag-untat na antes paman maunahan sang mga kaaway ukon makasahan sang buy-bust operation.
Sa karon, may ginakabig na nga person of interest ang mga kapulisan angut sa insidente.
