ROXAS CITY – Ginkalipay sang transport group nga Hugpong Piston Capiz ang desisyon sang Land Transportation Franchising and Regulatory Board (LTFRB) nga tugutan nga makabiyahe ang mga jeepney apisar wala pa maka-consolidate sa PUV Modernization Program.
Sa interview sang Bombo Radyo kay Mr. Joebert Carandang, Hugpong Piston Capiz President, suno diri maayo ini nga balita para sa mga operators kag jeepney drivers bangud makabiyahe pa sila tubtob Enero 31, 2024.
Nagapati ini nga pinaagi sa ginpaguwa nga Memorandum Circular sang LTFRB, nabinag-binag na sang ahensya nga daku ang mangin epekto sang modernization program kag tuman nga maapektuhan ang transportation sector ilabi na sa National Capital Region (NCR).
Suhestyon ni Carandang, sa baylo nga obligadahon sang LTFRB ang mga operators kag jeepney drivers nga magsulod sa kooperatiba mas maayo kun mag-import na lang ang mga ini sang euro-6 engine kag ipa-utang sa mga drivers kag operators kag masuportahan ang mga traditional jeepneys.
Pinaagi sini, mahimo nga ma-upgrade ang ila jeepneys kag sarang nga makipag-kumpentensya sa ginarequired nga standard sang modernization sang gobyerno.
Nagalaum si Carandang, nga dalayon na magbag-o ang desisyon sang LTFRB kag suportahan ang mga traditional jeepneys.
