ROXAS CITY — Kasado na ang patigayunon nga untat-biyahe sang pila ka katapo sang sektor sang transportasyon sa probinsiya sang Capiz sa maabot nga Lunes kag Martes nga adlaw.
Suno kay Mr. Joebert Carandang, presidente sang Hugpong Transport-Capiz, magapakigbahin sila sa patigayunon nga nationwide transport strike agud ipakita ang ila pagpamatuk sa PUV modernization program sang gobyerno nga suno sa ila magaresulta sa pagphase out ukon pagkadula sang mga unit sang public utility jeepneys ukon PUJs nga naga-edad 15 ka tuig pasaka.
Ginalauman ni Carandang sa Lunes ang pag-upod sang tanan nga mga pampubliko nga salakyan bangud indi lamang ang mga PUJ’s ang sakop sang nasambit nga programa nga ipatuman sang Department of Transportation.
Suno sa iya, magasugod ang untat biyahe alas-5 sa aga sang Lunes tobtob alas-5 sa aga sang Martes.
Samtang ginklaro ni Carandang ang nagalapta nga report nga ginhungod sang transport sector nga i-dungan ang untat-biyahe sa pagbukas man sang klase sa pampubliko nga elementarya kag sekondarya nga mga buluthuan.
Suno kay Carandang, madugay na nga gintalana sang sektor ang petsa sang untat-biyahe kag wala sila sang katuyuan nga i-sabotahe ang pagbukas sang klase sa Lunes.
