MANILA-Nagprotesta sa Quezon City sang Lunes nga aga ang nagkalain-lain nga transport groups bangod sa padayon nga pagsaka sang presyo sang gasolina kag diesel, nga suno sa mga driver nagapangabudlay sang ila adlaw-adlaw nga kita.
Ginpangunahan sang Manibela ang protesta upod ang mga driver sang Transport Network Vehicle Service ukon TNVS, motorcycle taxi riders, UV Express kag truckers. Nagsugod ang ila caravan sa University Avenue kag nagpadulong sa Philcoa area sa Commonwealth Avenue.
Suno sa mga driver, naganubo na ang ila take-home pay bangod sa daku nga bahin sang ila kita ang nagakadula sa gastos sa krudo. Ginpahayag sang pila ka nagprotesta nga may mga tion nga halos wala na sila sang mauli nga kita para sa ila pamilya.
Ginpahayag ni Manibela chairman Mar Valbuena nga ang transport strike isa na lamang ka last resort agud mapamatian sang Department of Energy, Department of Transportation kag Land Transportation Franchising and Regulatory Board ang ila panawagan para sa mas epektibo nga sabat sa fuel crisis.
Ginpangabay man ni Valbuena ang dugang nga P2 nga fare increase, bangod suno sa iya, indi na igo ang P1 nga fare hike nga ginhatag sa mga driver, nga gin-file pa sang Marso sang mas manubo pa ang presyo sang krudo.
Ginkwestyon man sang transport groups ang wala pagpatuman sang suspension sang fuel excise tax kag ang mga ginapahayag nga penalty ukon pagpasunod sang LTFRB batok sa mga driver nga nagaapil sa protesta.
Nag-upod man sa mobilization ang Confederation of Truckers Association of the Philippines ukon CTAP, nga nagpakita sang suporta sa panawagan sang iban nga transport groups kag nagpahayag nga apektado man sang pagsaka sang presyo sang fuel ang ila sektor.
