Ginmandu ni Transportation Secretary Vince Dizon ang pagbawi sang taxi driver’s license kag ang prangkisa sang operator matapos nag-viral ang driver bangud sa pagpanukot sang P1,260 sa pamasahe halin sa NAIA Terminal 3 pakadto sa Terminal 2 nga may distansya nga 8.4 kilometros lamang.
Suno kay Dizon, gilayon niya nga ginmanduan ang Land Transportation Franchising and Regulatory Board (LTFRB) kag Land Transportation Office (LTO) nga kanselahon ang driver’s license kag ang prangkisa sang operator.
Suno sa iya, posible nahibaluan sang operator ang ginahimo sang driver, kag madamo na sang reports sang amo nga mga insidente. Nahibaluan nga nakarehistro sa isa ka Taxi Hub Transport ang nasambit nga taxi.
Dugang pa niya, wala ginapahanugutan ang ila mga driver nga magkontrata sa isa lang ka bayad.
Nagpanugyan man si Dizon sa publiko nga i-report ang kasubong nga insidente kag ginrekomendar ang paggamit sang Transport Network Vehicle Services (TNVS) ukon ride-hailing apps agud malikawan ang kasubong nga scam.
