Ginbag-o ang travel plans ni Vice President Sara Duterte matapos ang ginaalegar last-minute approval sang Office of the President.
Sa ginpaguwa nga statement sang bise presidente, iya ginpahayag nga magapasa siya sang bag-o nga request sa nasambit nga opisina.
Gin-issue ni Duterte ang sulat sa Office of the President isa ka adlaw matapos gin-grant ang iya authority to travel halin kuntani subong nga adlaw tubtob sa Mayo 15 sa lima ka mga pungsod sa pihak sang nagapadayon nga impeachment proceedings batuk sa iya.
Nasaad sa statement sang bise presidente ang sarkastiko sini nga pagpasalamat sa Office of the President bangud sa ginaalegar late na nga paghatag sa iya sang travel authority.
Gin-abisohan man niya ang opisina nga siguraduhon nga ma proseso sang maayo ang mga nagakaigo nga dokumento kag insakto ang pag-issue agud mahatagan sang ligwa ang pagpreparar sini kag indi nga pila na lang ka oras kag amo na ang departure time sang bise presidente.
Sandig sa dokumento nga pirmado ni Acting Executive Secretary Ralph Recto, si Duterte ang ginpahanugotan nga magpadulong sa The Netherlands, Republic of Korea, Belgium, Germany kag sa United Kingdom pinaagi sa leave of absence kag sa paggamit sang iya kaugalingon nga kwarta kag indi sang gobyerno.
