ROXAS CITY – Ginpatpat sang provincial information officer sang Capiz ang kaundan sang ginpapanaug nga Executive Order No. 16 sang gobernador sang probinsiya.
Ginpahayag ni Atty. Atlas Catalan nasandig ang EO No. 16 sa resolution No. 29 sa diin gikan sa Enhanced Community Quarantine ginpapanaug ang probinsiya sang Capiz sa General Community Quarantine epektibo subong nga adlaw, Mayo 1, 2020.
Gindihon ini sang gobernador agud may pagasundon nga guidelines ukon pagsulundan sa pagpapanaug na sa GCQ sang probinsiya humalin subong nga adlaw tobtob Mayo 15, 2020.
Pinaka-importante sa kaundan sang EO suno kay Catalan ang travel restriction sa diin indi sa gihapon pagpahanugutan nga may makasulod sa Capiz.
Apang may exception diri, kasubong sa mga empleyado sang gobyerno nga kinahanglan lamang magpresentar sang ila valid ID kag travel order.
Sa mga non resident, apang nagatrabaho sa probinsiya, magdala lamang sila sang ID, health declaration, medical certificate kag certificate of employment.
Kalakip pa sa makasulod sa probinsiya ang mga medical personnel, mga naaksidente ukon kinahanglan nga dalhon sa ospital, armored cars, stranded OFWs kag delivery trak nga nagakarga sang essential goods.
Kinahanglan nga magdala sila sang valid ID, DTI permit, mayor’s permit kag delivery receipt ukon purchase order.
Ginpahanumdum man ni Catalan nga indi dapat magpanaug sa delivery trak ang driver kag duha ka mga pahinante sa diin ang magakuha lamang sang ila mga karga amo ang tawo nga ila kontak sa lugar.
