ROXAS CITY – Ginpasiguro ni Judy Grace Pelaez, head sang Provincial Disaster Risk Reduction and Management Office (PDRRMO) nga wala sang mga travelers nga gikan sa mga restricted areas sa National Capital Region, Cavite, Laguna kag Bulacan nga nakapauli sa probinsiya sang Capiz.
Ginpahayag sang opisyal nga bilang istrikto nga pagpatuman sa nakapagkit sa Resolution 104 sang National Inter-Agency Task Force (NIATF) nga gin-adoptar sang Regional Inter-Agency Task Force sa Western Visayas, hugot ang monitoring sa mga nagapauli nga mga travelers sa probinsiya kag ginasiguro nga indi sila halin sa mga nahinambitan nga lugar nga ginpaidalum sa NCR Plus Bubbles sa diin padayon ang pagtaas sang kaso sang COVID-19.
Suno kay Pelaez nga epektibo sang Marso 26, mas ginhugot ang pagpatuman sini nga pagsulundan agud indi malutsan ang probinsiya kag malikawan ang paglapta sang COVID-19.
Nahibaluan nga ang mga returning residents nga nagabalik sa probinsiya ang kinahanglan mag-comply sang pila ka mga rekisitos kasubong sang negative RT-PCR test 72-oras antes ang pagpauli kag S-PASS ukon Safe Swift and Smart Passage.
Nagahinyo man sang pag-intiende si Pelaez sa iban nga mga luyag magpauli apang indi mapahanugutan bangud gikan sila sa mga lugar nga ginpaidalum na sa Enhanced Community Quarantine ukon ECQ.
Suno diri kun padayon lamang ang paghatag sang kunsiderasyon kag kun magtaas ang kaso sa probinsiya, sila sa gihapon ang pagabasulon.
Ginapanindugan ni Pelaez nga ginahimo lamang nila ang ila obligasyon kag responsibilidad nga proteksyunan ang mga Capizeño.
Samtang suno kay Pelaez nga nabakunahan na sila tanan sa PDRRMO sang 1st dose sang COVID-19 vaccine kag natalana nga bakunahan sang 2nd dose sa bulan sang Abril.
