ROXAS CITY – Indi matul-id sang driver sang traysikol nga nagturn-over sang ginapahayag illegal nga droga nga nabilin sa iya traysikol kung sin-o sa iya nga mga pasahero ang nakabilin sini.
Sa interview sang Bombo Radyo kay alyas “Nonoy” ginpahayag nga una niya nga nangin pasahero ang isa ka lalaki nga nagsakay kag nagpadul-ong sa Barangay Cagay.
Ika-duha isa man gihapon ka lalaki nga nagikan naman sa Barangay Cagay kag padulong sa Roxas Avenue kag ang katapusan amu ang isa ka babaye nga nagpadul-ong naman sa Magallanes.
Suno kay alyas “Nonoy”, sa katapusan na niya sini nga pasahero natalupangdan ang kaha sang antipara kag sa pagdumdum iya sang katapusan sini nga pasahero ginmuno niya ini.
Apang suno sa babaye nga indi siya ang nagapanag-iya sang amu nga kaha.
Bangud sa pagkabalaka, gintsekyar sang driver ang amu nga suludlan agud makumpirmar nga antipara ang sulod sini apang dako ang iya kakibot sang nagbalandra sa iya ang pinutos sang ginapagayag illegal nga droga.
Matapos makit-an gilayon ini nga nagpadulong sa talatapan sang Barangay Punta Tabuc agud iturn-over sa mga opisyal.
Sa karun, yara na sa paghinakop sang Roxas City PNP ang amu nga illegal nga droga para sa nagakaigo nga disposisyon.
