ROXAS CITY – Padayon nga ginabulong sa ospital ang kritikal nga tricycle driver matapos nga nabungguan ang ginamaneho sini nga salakyan, sang kasugata nga truck sa national highway sang Barangay Manhoy, banwa sang Dao, kagab-i sang Domingo, Abril 24.
Ginkilala ang driver sang traysikol kay Samuel Famucol, 44-anyos, kag residente sang Barangay Pagbunitan, Sigma, Capiz.
Samtang ang driver sang Fuso truck ang ginkilala kay Norman Mamay, 29-anyos nga taga-Balete, Aklan.
Sandig sa inisyal nga imbestigasyon sang mga katapo sang Dao MPS, nagikan ang traysikol sa banwa sang Dumalag kag nagapadulong pa-direksyon sang Sigma, sang nabungguan ini pag-abot sa nasambit nga lugar, sang kasugata nga truck nga ginamaneho ni Mamay.
Bangud diri, nag-angkon sang bali’ sa nawala nga tiil kag kamot ang driver sang traysikol, nga gilayon ginpadangat sa RMPH.
Nagapabilin nga nakakustodiya ang driver kag ang ginamaneho sini nga truck sa Dao MPS para sa nagapadayon nga imbestigasyon.
