Ginpanindugan sang International Criminal Court (ICC) nga magapadayon ini sa pagpatuman sang ila mandato may kaangtanan sa natalana nga trial ni former President Rodrigo Duterte sa pihak sang daku nga sanctions nga ginpatuman sang gobyerno sang Estados Unidos.
Suno kay ICC President Tomoko Akane, ang korte magapadayon sa paggamit sang iya bug-os nga gahum nga may kahilwayan kag katarungan, base lamang sa kasuguan kag ebidensya, para sa kaayuhan sang madamo nga mga biktima sang mabug-at nga mga krimen.
Natalana ang trial ni Duterte sa Nobyembre 30 sa The Hague, Netherlands may kaangtanan sa panumbungon nga crimes against humanity bangud sa kaso nga pagpatay sa idalum sang iya kampanya batok sa iligal nga droga.
Ginpahayag sang tribunal ang ila panindugan matapos nga ginpatuman sang administrasyon ni US President Donald Trump ang bag-o nga restrictions kag sanctions batuk sa operasyon sang international court.
Nagapabilin naman ang ICC nga malig-on sa iya katuyuan nga maghatag sang hustisya sa pihak sang financial kag political pressure gikan sa pila ka dalagku nga mga pungsod.
