Ginpanindugan sang isa ka legal expert nga pamatuod ang kaso ni former President Rodrigo Duterte sa International Criminal Court (ICC) nga indi pa handa ang sistema sang hustisya sang Pilipinas sa pag-uyat sang mga kaso nga may kaangtanan sa crimes against humanity.
Sa interview sang Bombo Radyo kay Atty. Ephraim Cortez, president sang National Union of Peoples’ Lawyers, nga bangud sa mabaskog nga political background sang pamilya Duterte sa pungsod, mabudlay para sa mga otoridad nga magpatigayon sang imbestigasyon kag magpasaka sang kaso.
Suno kay Cortez, sa malawig nga pagpungko sang mga Duterte, wala sang may nangisog nga magpasaka sang kaso may kaangtanan sa alegasyon sang pagpatay kag iban pa nga paglapas sa tawhanon nga kinamatarong.
Dugang pa sini, sa subong, makabig na nga kadalag-an sang mga biktima ang progreso sang pagbista kay Duterte sa ICC, bisan malawig pa ang proseso.
