ROXAS CITY – Nakuha sang Tribu Capiznon ang 3rd place sa ginhiwat nga 2022 Sining Bayanihan Cultural Dance Troupe Regional Competition, kadungan sa pagselebrar sang mga katapo sang Philippine National Police (PNP) sang Police Community Relations (PCR) Month Celebration, sa Camp Martin Teofilo B Delgado, Fort San Pedro Drive, Iloilo City.
Sa interview sang Bombo Radyo kay Hon. Sandro Borce, SK Chairman sang Brgy. Talon, kag Kabataan Kontra Droga at Terorismo (KKDAT) Roxas City Based Chapter President kag Hon. Arvin Aguilar, SK Chairman sang Brgy. Dumolog kag KKDAT Secretary, suno sa mga ini nga dako nga bugal ang amu nga awarad sa umpisada sang organisasyon sang KKDAT sa Capiz.
Suno pa diri nga may yara gid lamang sila sang malip-ot nga tion sa pag-ensayo para sa nasambit nga kompetisyon, kag nangin dako nga pagpanghangkat ang konsepto sang ila gin-perform nga may kaangtanan sa ‘Binukot’.
Bangud sini nga kahiwatan, dako ang pagpasalamat sang mga SK sa katapo sang kapulisan nga ginakabug-osan sang Capiz PPO kag sa tanan nga nagsuporta sa amu nga programa, kun sa diin padayon ang pag-engganyo sang mga lider sang Kabataan nga magpasakup sa kaangay nga organisasyon.
Sa pihak nga bahin, bangud sa mga insidente sang pag-utas sang kabuhi nga masami ginakaulamiran sang mga pamatan-on, natigayon naman nga mapalab-ot sa otoridad sang nasambit nga mga SK Chairmen ang amu nga isyu agud mahatagan sang nagakaigo nga aksyon.
