Padayon nga nagabubo ang mga tribute nagikan sa mga fans kag music industry kasunod sang pagtaliwan sang 31-anyos nga anay miyembro sang sikat nga English-Irish pop boy band nga One Direction nga si Liam Payne matapos mahulog nagikan sa balcony room sang ikatatlo nga panalgan sang isa ka hotel sa Buenos Aires, Argentina kahapon sang gab-i sang Miyerkules, Oktubre 16.
Nagpahayag sang pagkakibot kag pagkasubo ang mga fans kun sa diin pila sa ila ang nagtipun-tipon sa guha sang Casa Sur hotel kun sa diin nasapwan patay ang singer.
Nag-offer naman ang mga tagasuporta ni Payne sang isa ka vigil, kalinong, nagsindi sang mga kandila kag ginpatunog ang pila ka mga kanta sang 1D.
Pila naman sa dalagkuan nga mga pangalan sa music industry ang naghatag sang honor sa nagtaliwan nga musician, kalakip na diri si British singer Olly Murs nga nagpahayag nga devastated siya sa natabu samtang gindumdom naman ni American singer-songwriter Charlie Puth ang kabuot ni Payne nga isa man sa pinakauna nga major artists nga iya nakatrabaho.
Sa karun, wala pa sang ginpaguha nga statement ang iban pa nga mga miyembro sang 1D sa pagtaliwan sang singer.
