PRESIDENT ROXAS, CAPIZ- Arestado ang isa ka tricycle driver, matapos nga nakuhaan sang armas-luthang nga taklos sini kag iligal nga droga sa Barangay Pondol, President Roxas, Capiz.
Ang arestado amo si alyas ‘Reynaldo’, 44-anyos kag residente sang nasambit nga lugar.
Sa interview sang Bombo Radyo kay Police Major Alfred De Leon, Hepe sang President Roxas Municipal Police Station, iya ginpahayag nga may isa ka concerned citizen ang nagpalab-ot sa ila nga talatapan nga may yara ang isa ka tricycle driver nga nagataklos sang armas-luthang.
Suno kay De Leon, gilayon nila nga ginpadulungan ang amo nga lugar kag naabtanan ang nasambit nga persona.
Narekober sa paghinakop sang amo nga tricycle driver ang is ka unit sang calibre 22 revolver nga loaded sang duha ka mga bala kag wala sang lisensysa. Nakuha pagid sa paghinakop sini ang duha ka sachet sang ginapatihan shabu nga may kabug-aton nga 5grams kag may standard drug price nga P34,000.
Sa subong, nagapabilin ang amo nga lalaki sa kustodiya sang President Roxas Municipal Police Station kag natalana nga pasakaan sang mga kaso nga paglapas sa Republic Act 10591 ukon “Comprehensive Firearms and Ammunition Regulations Act kag Republic Act 9165 ukon “Comprehensive Dangerous Drugs Act of 2002.”
Interviewed by Bombo Jessa Mae Siman De Los Santos
