ROXAS CITY – Dakop ang tricycle driver, matapos ang ginkasa nga buy-bust operation sa Barangay Sta Cruz, Ivisan, Capiz.
Ginkilala ang nadakpan nga si Eljohn Valdicante Limboy, 39-anyos kag residente sang Barangay Lonoy sining syudad.
Sa impormasyon nga nakuha sang Bombo Radyo nagikan sa Ivisan Municipal Police Station, ginapahayag nga natigayon nga madakpan si Limboy pinaagi sa gintingub nga pwersa sang Capiz-PPDEU, Ivisan MPS, Mambusao MPS kag Sigma MPS.
Nakuha sa paghinakop sang nadakpan ang 4 tanan ka sachet sang ginapatihan shabu nga may kabug-aton 4 gramos kag Standard Drug Price nga P27,000, P1,500 nga buy-bust money, P1,000 nga boodle money kag mga drug paraphernalia’s.
Kaso nga paglapas sa RA 9165 ukon Comprehensive of Dangerous Drugs Act of 2002 ang paga-atubangon sang nasambit nga nadakpan.
Sa karun yara na ini sa kustodiya sang Ivisan MPS para sa nagakaigo nga disposisyon.
