ROXAS CITY – Arestado sa drug buy bust operation sang mga katapu sang Provincial Drug Enforcement Unit (PDEU) sang Capiz Police Provincial Office ang 37-anyos nga tricycle driver sa Sacred Heart Avenue, Barangay Lawaan, Roxas City.
Ginkilala ang suspek kay Eugene Villasoto Baylon, sang Barangay San Jose apang temporaryo nga nagaestar sa Rizal Street, Barangay VII, sining syudad.
Suno kay Senior Inspector Hilbert Gervero, team leader sang PDEU ginagamit nga front sang suspek ang pagbiyahe sang colorum nga tricycle sa gab-i para makatransaksyon ini sang iligal nga droga.
Narekober sa posesyon ni Baylon ang apat ka sachet sang ginapatihan shabu, P1,000 nga marked money, digital weiging scale kag sling bag.
Samtang nagahibi nga wala sang luha nga nagapakitluoy sa mga pulis si Baylon kag nagapanindugan nga indi siya ang nagapanag-iya sang nasambit nga sling bag sa diin nakuha ang shabu.
Nahibaluan nga siyam ka tuig nga nabilanggo si Baylon bangud sa kaso may kaangtanan sa iligal nga droga kag sang nagligad lamang nga tuig 2017 ini nakaguwa.
