MAMBUSAO, CAPIZ – Gin-turn over sang isa ka tricycle driver sa kapulisan ang sachet sang shabu nga nadiskubre sini sa terminal sa Barangay Poblacion Proper, Mambusao, Capiz.
Sa interview sang Bombo Radyo kay Police Captain Dennis Losbañes, hepe sang Mambusao Municipal Police Station, aksidente ang pagkadiskubre sang tricycle driver nga si alyas Nonoy sang nasambit nga iligal nga droga.
Suno kay Losbañes nga samtang nagapahuway si alyas Nonoy sa terminal, natalupangdan sini ang isa ka puti nga sachet nga nakaputos pa sa papel.
Sang nahibaluan niya nga shabu ang unod sang sachet, gilayon niya ini nga gin-turn over sa police station agud ipaidalom sa tama nga proseso.
Natalana naman nga ipaidalom sa laboratory examination ang amo nga sachet sang shabu sa Forensic Unit sang Mambusao PNP agud kumpirmahon kag makahimo sang nagakaigo nga aksyon.
Nagapadayon ang imbestigasyon sang kapulisan agud tukibon ang ginhalinan sang droga.
