ROXAS CITY – Nadakpan sa akto nga nagapakighilawas sa madulom nga bahin sang baybayon sang Roxas City ang isa ka tricycle driver kag kaupod sini nga babaye.
Sa interview sang Bombo Radyo kay Punong Barangay Reynaldo Magallanes sang Barangay Baybay, Roxas City, ginpahayag sini nga mismo ang kagawad kag mga tanod sang barangay nga nagapatrolya sa lugar ang nakadakup sa magkapareha.
Nakakuha sang atensiyon sang grupo ang naka-park nga tricycle sa madulom nga bahin sang baybayon rason nga ila ini ginpalapitan agud magpangusisa.
Nagduda sila nga may ginahimo nga makaduluda ang driver kag kaupod sini bangud wala na sa sulod sang tricycle ang pulungkuan.
Ginpaiwagan nila sang flashlight ang palibot kag didto ila nakita ang magkapareha nga yara sa akto nga nagapakighilawas.
Hinali naman nga nagdalagan kag nagpanago ang lalaki nga nabilin ang babaye matapos sila ang matukiban.
Apang wala madugay nagguwa man ang lalaki sa iya ginapanaguan kag nagpangayo sang pasaylo sa mga barangay officials sa ila nahimo.
Nagpromesa man ang lalaki nga indi na masulit ang natabo kag nagpangabay pa sa mga opisyal nga indi lamang kuntani pag-isugid sa iya asawa ang iya ginhimo.
