ROXAS CITY – Pilason ang tricycle driver kag kaupod sini nga duha ka babaye matapos nga nabungguan sang isa ka van sang CAPSU Dumarao sa National Highway sa Barangay Sibaguan, Roxas City subong nga adlaw Pebrero 10, 2022.
Ginkilala ang driver sang tricycle kay Rodolfo Morales, 63-anyos kag ang sakay sini nga sanday Rochele Manguardia kag Jay-Ann Nina Bingko kag lunsay mga residente sang nasambit nga lugar.
Sandig sa mga nakakita sang nagluntad nga insidente nag-U-Turn ang driver sang tricycle matapos nga naglapaw sa panaugan kun tani sang isa niya ka pasehero, rason nga nabungguan ini sang van nga nagasunod sa ila nga ginkilala kay Alvin Lial, 33-anyos residente sang Barangay Tamulalud banwa sang Dumarao.
Bangud diri nag-apok ang isa ka pasahero kaupod ang driver samtang, ang isa ang nabilin kag naipit sang nagtakilid nga tricycle rason nga nag-angkon sang pilas sa magkatuhay nga parte sang ila nga lawas.
Gilayon man nga gindala sa magkatuhay nga ospital ang mga nasambitan nga nagkalapilasan agud dapatan sang nagakaigo nga pagbulong.
Sa karun yara na sa kustodiya sang Roxas MPS ang driver sang van para sa nagakaigo nga disposiyon.
